Í byrjun júlí 2020 fékk Hyndla ehf, ásamt Hafrannsóknastofnun og Nýsköpunarmiðstöð Íslands, fyrirtækjastyrk SPROTA. Styrkurinn er til tveggja ára að fjárhæð kr. 20 milljónir. Meginmarkmið verkefnisins, sem verið er að styrkja eru tilraunir, rannsóknir og prófanir á:
- Hagkvæmu kerfi til sjálfbærrar ræktunar klóblöðku, verðmæts matþörungs, við stýrðar aðstæður í borholusjó á landi.
- Kjöraðstæður fyrir vöxt þörunganna hvað varðar hita, ljós, straum, næringarsölt og þéttleika í ræktun.
Við hönnun kerfisins verður lögð áhersla á lögun kerja, dýpt, efnisval, lýsingu, loftun og strauma, rennsli, þrif og sjálfvirkni. Slíkt kerfi hefur ekki verið þróað annars staðar til þessa. Kerfið hentar líka vel til ræktunar annarra stórþörunga.
Haldið verður áfram með ræktunartilraunir á klóblöðku, alíslenskum rauðþörungi. Gerðar verða tilraunir til fjölgunar þörunga með því að kurla þá niður. Í framtíðinni er ætlunin að hefja einnig tilraunir með ræktun sölva og maríusvuntu.
Við hjá Hyndlu ehf erum afar þakklát og stolt yfir að verkefnið fékk þennan ómetanlega stuðning. Þetta gefur okkur tækifæri á að halda áfram af fullum krafti.
